Garizumako hirugarren asteko zapatua

Garizumako 3. asteko zapatua

San Lukasen liburutik (Lk 18, 9-14)

Aldi haretan, parabola hau esan eutsen Jesusek euren buruak zintzotzat hartzen eta besteak gutxiesten ebezan batzuei:

«Gizon bik igon eben tenplura otoitz egitera, bata fariseua eta bestea zergalaria. Fariseuak, zutunik, honan egiten eban otoitz bere barruan: "Eskerrak emoten deutsudaz, ene Jainko, besteak lakoa ez nazalako: lapur, gaizkile, adulteriogile; ezta horko zergalari hori lakoa ere. Astean bitan egiten dot barau, eta ditudan guztien hamarrenak emoten ditut".

Zergalaria, barriz, urrun gelditurik, ez zan begiak zerura jasotera ere ausartzen. Bular joka ziharduan, ostera, esanez: "Ene Jainko, erruki zakioz pekatari honi!"

Hara Nik esan: azkeneko hau Jainkoagaz adiskideturik bihurtu zan etxera; bestea, barriz, ez. Izan ere, bere burua goratzen dauana beheratu egingo dau Jainkoak, eta bere burua beheratzen dauana goratu».

Iruzkina

Ona da Jesus, baina ez dau dana ontzat emoten. Jokabide batzuk min emoten deutsoe eta horrren erakutsia emoten dau. Zergaitik jarri behar dau batek bere ustetan beste baten gainetik? Zerk egiten dau bat bestea baino hobea? Legea ezagutzeak beteteko aukerea ere emoten dau; ezagutzen ez dauanak nekez bete daike-ta. Baina Legea ezagutu ere egiten ez dauana baino "hobea" ete da, gero, beteten dauana? Hor ete dago, gero, ontasunaren neurria?

Jesusek gure arteko hartu-emonei begiratzen deutse, eta hortxe aurkitzen dau ontasuna: bestea aintzat hartzekoa bazara, besteari zerbitzu egitekoa bazara, bestea maite badozu, orduantxe zara ona haregazko eta Jainkoaren aurrean ere. Bestela, bestea aintzat hartzen ez badakizu, edo gaitzesten badozu... jai daukazu; Jesusek begitartean hartuko zaitu.

Eta hauxe da Farisearren jokabidea: Legea ezagutzen dabenez, beteten dabela uste izatea, eta horrek Jainkoaren aurrean zintzoak egiten dauzela. Eta, Jesusen ustez, ondorioa besterik da, harro-putz agertzen dalako parabolako Farisearra. Bai, eskerrak emoten deutsoz Jainkoari «besteak lakoa ez nazalako: lapur, gaizkile, adulteriogile... Astean bitan egiten dot barau, eta ditudan guztien hamarrenak emoten ditut»; baina «ezta horko zergalari hori lakoa ere» badino, ha gaitzetsiz eta bere burua bestearen gainetik jarriz. Eta hori ezin izango dau Jesusek onartu.

Legea ezagutu eta beteteak ez dau eroan behar, ba, ha ezagutzen ez dauana, edo bete ezin dauana gaitzestera; ez eta, "beste" hori, beste barik, zergalaria dalako, zikin eta gaitzesgarri lez baztertzera. Jainkoaren aurrean norbere burua zintzotzat ikusteak "pekatariaren" erruki izatera eroan behar izango leuke, hari bere "zulotik" urteten laguntzera. Horrela ez bada ez gara-ta Jainkoaren antz eta irudiko.

Sal 50, 3-4. 18-19. 20-21ab

R/. Opariak barik, leialtasuna gura dot Nik.

Erruki zakidaz, Jainko, zure maitasun handiaz,

kendu egizu nire errua zeure amaibako errukiaz.

Garbitu nagizu zeharo nire hobenetik,

garbitu nire gaiztakeriatik. R/.

Ez jatzu-eta atsegin oparirik,

erre-opariak ez zendukez hartuko nik emonik.

Nire oparia, Jainko, bihotz damutua:

ez dozu baztertuko, Jainko,

bihotz damutu eta umildua. R/.

Agertu zaitez, Jauna, onbera Sionegaz,

barriztau egizuz Jerusalemgo harresiak.

Orduan onartuko dozuz

legezko opari, eskeintza eta erre-opariak. R/.